2Cor 4 | BOJ | STEP | Qotei a iga qa tulaŋ dulosiq deqa wau di iga egej. Deqa iga wau di ojqajqa asgigosaieqnu.

2 Corinthians 4

Qotei aqa wau tamo naŋgi web mandam na gereiyo qaji di bul unub

1 Qotei a iga qa tulaŋ dulosiq deqa wau di iga egej. Deqa iga wau di ojqajqa asgigosaieqnu. 2 Kumbra uge uge kalil tamo naŋgi ulitosib yeqnub qaji di iga qoreiyeqnum. Iga gisaŋ kumbra na walwelosaieqnum. Iga Qotei aqa anjam bulbulyo-saieqnum. Iga boleq di anjam bole segi mareqnum. Yim tamo kalil naŋgi gago kumbra di unsib naŋgo are miligiq di qalieqab, bole, iga Qotei aqa ŋamgalaq di wau bole yeqnum. 3 Ariya tamo naŋgi padalqa gamq di unub qaji naŋgi Yesus aqa anjam bole iga palonteqnum qaji di aqa utru poinjrosaieqnu. 4 Mandam endeqa qotei gisaŋ Satan a na tamo uŋgasari Kristus qa naŋgo areqalo siŋgilatosaieqnub qaji naŋgo areqalo getentejunu deqa Kristus aqa anjam bole naŋgo are miligiq aiqa keresai. Deqa naŋgi Kristus aqa suwaŋ unosaieqnub. Kristus a segi Qotei. A segi ñam koba ti unu.

5 Niŋgi quiye. Iga gago segi kumbra qa marosaieqnum. Iga endegsi mareqnum, “Kristus Yesus a gago Tamo Koba. Iga Yesus aqa anjam dauryeqnum deqa iga nuŋgo wau tamo unum.” Iga degsi segi mareqnum. 6 Tulaŋ nami Qotei a iŋgi iŋgi kalil gereiyqa osiqa a endegsi marej, “Ambruq dena suwaŋ brantqas.” Ariya bunuqna Qotei aqa suwaŋ di iga qa bosiqa gago are miligi suwantetgej deqa iga Kristus aqa ulatamu uneqnum. Dena iga suwaŋ bole unsimqa Qotei aqa riaŋ ti aqa siŋgila ti geregere poigeqnu.

7 Iŋgi boledamu di gagoq di unu. Ariya iga siŋgila saiqoji unum. Iga web bul jagi na gereiyo qaji. Deqa tamo kalil naŋgi iga nugoqnsib endegsib qalieeqnub, “Siŋgila kobaquja iga uneqnum di Qotei aqa siŋgila. Di Pol aqa siŋgila sai. Siŋgila dena siŋgila kalil tulaŋ buŋnjrejunu.” Naŋgi degsib qalieeqnub. 8 Sawa sawa kalilq dia gulube gargekoba iga qa beqnu. Ariya gulube dena gago siŋgila kobotetgosaieqnu. Iŋgi iŋgi gargekoba na gago areqalo niñaqyetgeqnu. Ariya iŋgi iŋgi dena gago areqalo torei ugetetgosaieqnu. 9 Gago jeu tamo naŋgi na iga gulube egeqnub. Ariya Qotei a deqa iga uratgosaieqnu. Naŋgi na iga lugoqnsib ŋeiotgeqnub. Ariya Qotei na olo iga aqaryaigeqnu deqa naŋgi iga torei ugeugeigosaieqnub. 10 Gago jejamuq dia tamo uŋgasari naŋgi gaigai Yesus aqa moio uneqnub. Deqa Yesus aqa ŋambile dego gago jejamuq di branteqnaq naŋgi uneqnub. 11 Iga Yesus aqa wau ojeqnum deqa iga mandamq endi sonamqa gago jeu tamo naŋgi na bati gaigai iga moiotgwa laqnub. Kumbra dena Yesus aqa ŋambile dego gago jejamuq di olo branteqnaq tamo uŋgasari naŋgi uneqnub. 12 Deqa moio a gagoq di waueqnu. Ariya ŋambile a nuŋgoq di waueqnu.

13 Iga Yesus qa gago areqalo siŋgilateqnum deqa Qotei aqa anjam bei nami neŋgreŋyeb qaji di iga dauryosim yeqnum. Anjam agiende, “E Qotei qa ijo areqalo siŋgilateqnum deqa e aqa anjam marsim laqnum.” O was qu, iga kamba dego Yesus qa gago areqalo siŋgilateqnum deqa iga dego aqa anjam marsim laqnum. 14 Iga endegsi qalieonum, Qotei na Tamo Koba Yesus subq na tigeltej deqa mondoŋ a na iga kamba dego subq na tigeltgwas. Osim iga ti niŋgi ti joqsim Yesus aqa areq osi oqwas. 15 E degsi maronum. Di kiyaqa? E qalieonum, kumbra kalil gagoq di branteqnu qaji di niŋgi aqaryaiŋgwajqa deqa. Qotei a iga qa are tulaŋ boleiyeqnu aqa kumbra di tamo uŋgasari gargekoba naŋgi qa gileqnu. Deqa tamo uŋgasari naŋgi di Qotei aqa kumbra di unsib a tulaŋ biŋiyoqnsib aqa ñam soqtoqnqab.

Qotei aqa wau tamo naŋgi laŋ qure qa iŋgi iŋgi qa are qaloqnsib deqa naŋgi wauqa asginjrosaieqnu

16 Iga Qotei aqa kumbra deqa are qaloqnsim deqa iga aqa wau ojqajqa asgigosaieqnu. Bole, gago jejamu a uge qa laqnu. Ariya gago are miligi a bati gaigai olo boleoqnsiq siŋgilaeqnu. 17 Di kiyaqa? Iga qalieonum, gulube ti jaqatiŋ ti iga bini eqnum qaji di tulaŋ kokba sai. Naŋgi sokiñalayosib koboqab. Iga gulube di eqnum deqa mondoŋ iga laŋ qureq dia so bole gaigai sqom. Iga qalieonum, iŋgi bole bole iga mondoŋ oqom qaji di tulaŋ boledamu. Iŋgi iŋgi dena mandam qa iŋgi iŋgi kalil tulaŋ buŋnjresqas. 18 Iŋgi iŋgi iga gago ŋamdamu na uneqnum qaji di sokiñalayosim koboqas. Deqa iga iŋgi iŋgi di kokoqyosaieqnum. Ariya iŋgi iŋgi iga gago ŋamdamu na unqa keresai qaji di bati gaigai sqas. Deqa iga iŋgi iŋgi di kokoqyoqnsim sqom.